Numbers 12
UMiriyamu lo-Aroni baphikisa uMosi
1UMiriyamu lo-Aroni basuka basebeqalisa ukusola uMosi ngenxa yomkakhe ongumKhushi, njengoba wayethethe umKhushi. 2Babuzana bathi: “Kambe uMosi nguye yedwa ongumlomo kaJehova na? Kanti lathi kazange asenze izikhulumeli zakhe na?” UJehova wakuzwa lokhu. 3(UMosi wayeyindoda ethobeke kakhulu, ethobeke ukwedlula wonke amadoda asemhlabeni.) 4Khonokho nje uJehova wathi kuMosi, lo-Aroni loMiriyamu, “Phumani lize eThenteni lokuHlanganela, lonke lobathathu.” Lakanye beza bobathathu. 5UJehova wehla ngensika yeyezi; wema esangweni leThente wasebiza u-Aroni loMiriyamu. Kwathi lapho sebesondele bobabili, 6uJehova wasesithi, “Lalelani amazwi ami: “Nxa kulomprofethi kaJehova phakathi kwenu, ngiziveza kuye ngemibono, ngikhuluma laye emaphutsheni. 7Kodwa akunjalo ngenceku yami uMosi; uthembekile endlini yami yonke. 8Nxa ngikhuluma laye siqondana ubuso ngobuso, ngokucacileyo kungesikuphicana; uyasibona isimo sikaJehova. Kungani pho belingesabi ukusola inceku yami uMosi na?” 9Ulaka lukaJehova lwavutha phezu kwabo, uJehova wasesuka kubo. 10Ekusukeni kweyezi phezu kweThente, kwabonakala uMiriyamu esemi lapho eselobulephero obunjengongqoqwane. U-Aroni uthe emkhangela wambona eselobulephero; 11wasesithi kuMosi, “Awu, nkosi yami, ungasibeki icala ngenxa yesono esisenze ngobuwula. 12Ungamyekeli enjengomntwana ozelwe efile, inyama yakhe idliwe nganxanye.” 13Ngakho uMosi wakhala kuJehova wathi, “Nkulunkulu, ngiyakucela, msilise.” 14UJehova waphendula uMosi wathi, “Kambe ngabe uyise ubemkhafulele ebusweni, ubengayikuthwala ihlazo okwezinsuku eziyisikhombisa na? Mkhupheni ahlale ngaphandle kwezihonqo okwezinsuku eziyisikhombisa; ngemva kwalokho selingambuyisa.” 15Ngakho uMiriyamu wahlaliswa ngaphandle kwezihonqo okwezinsuku eziyisikhombisa, ngakho abantu kabaqhubekanga ngohambo waze wabuyiswa. 16Ngemva kwalokho, abantu basuka eHazerothi bayamisa izihonqo eNkangala yasePharani.
Copyright information for
NdeIBE